إطلالة على تعدين العملات الرقمية

ماهو تعدين العملات الإلكترونية || تعدين عملة البيتكوين

وكان الهدف من تعدين العملات كعملة البيتكوين ان يتم انشاء عملة رقمية تقدر كل الناس تستخدمها، بل وكمان تتحكم في قيمتها السوقيه على الانترنت حسب نسبة التداول وغيره من اي اثار وبدون اي تدخل او رقابة من اي هيئات حكوميه او رسمية، الناس فقط هي اللي هتحدد قيمتها حسب التداول.

ودي هنا تعتبر ميزه، مش زي مثلا عملات الحقيقيه اللي بنستخدمها بشكل يومي زي الجنيه، محتكم فيه سياسات واقتصاد الخ الخ.

تاني ميزه كمان للعمله الرقميه، انه مفهاش اي تتبع، ودي هتبقى مدخل للناس اللي مش كويسة، وفي نفس الوقت برضو هي ميزه للناس اللي بتحب تتعامل بحريه، الموضوع هنا عامل زي السكينه، ممكن تقتل بيها وممكن برضو تقطع بيها تورتة احتفالك بالثانويه العامه .

بعكس مثلا العملات الحقيقيه، لما تيجي تتعامل باي تعامل بيتم تتبعك وتتبع الشيكات والعمليات الي قمت بيها في الشراء.

وكيفية استخدامه دي بتبقى عن طريق مفتاح مخصوص ليك انت بس، والمفتاح ده بيبقى عباره عن اكواد مكونه من ارقام وحروف خاصه ليك زي البصمه كده، ومن خلاله محدش يقدر يتتبعك في اي عمليه + انك ممكن تقدر تغيره في اي وقت.

وهنا نقدر نقول ان محدش هيقدر من اي جهه يعرف الفلوس دي رايحه فين وراجعه منين.

كيفية الحصول على العملات الإلكترونية

طب العمله دي هنحصل عليها ازاي ؟

مفيش اي شئ هتقدر تستخدمه هنا الا لما يكون مدعوم بشئ يخليه يستمر ويتم انتاجه حسب الطلب ويديله القيمة.

حرصا على بقاء العمله وعلى استمرار هدفها انه محدش يقدر يتم التلاعب ب العمله، ازاي ؟مش دي عمله رقميه وع النت وممكن حد يقدر يلعب بيها ؟ ويقول انا معايا مثلا 1000 بيتكوين.

ايه اثباتك هنا ان العمله دي فعلا معاك وانك مش حد حرامي مثلا ؟

وهنا بيجي دور تالت ميزه، انه مستحيل حد يقدر يتلاعب بالبيتكوين وده اللي مديها الاستمراريه في البقاء، وهنا هننتقل لنقطة تعدين العملات الإلكترونية.

ماهو تعدين العملات الإلكترونية ؟

العمله دي طريقة التداول بيها بيبقى عن طريق حاجه اسمها بلوكات وكل بلوك له رقمه، وكل بلوك بداخله عدد العمليات اللي تمت باستخدام البيتكوين، وكل عمليه لها رقمها ولها كودها وبيانتها الخاصه، فانت لو شخص مخادع مش هتعرف تثبت انه معاك بيتكوين الا من خلال العمليات اللي تمت، غير ان العمليات دي سهل الاتطلاع عليها في العالم كله، ف النتيجه هتكون انه مستحيل تقدر تثبت انه معاك بيتكوين مدام عملياتك اللي حصلت منها على البيتكوين مش متسجله في البلوكات دي.

وهنا بقى يجي دور تعدين العملات الإلكترونية !!

اللي هو اثبات انك معاك بيتكوين ببساطه شديدة.

ماهي آلية عمل تعدين العملات الإلكترونية؟ وماهي الأجهزة المناسبة للتعدين؟

الفكرة كلها في التعدين ان الناس بتستخدم قوة الكمبيوترات بتاعتها وكروت الشاشة عشان تثبت ان كل التعاملات اللي داخله البلوك دي صحيحه تماما ومفيهاش اي تلاعب.

واصحاب كمبيوترات تعدين العملات الإلكترونية مرتباتهم بتيجي عن طريق البلوكات دي في انه يحلها ويثبت انها صح بياخد حوالي 12.5 بيتكوين، اللي هو يعتبر مبلغ ضخم جدا، لانه عملة البيتكوين حاليا قيمتها تساوي 2600 دولار امريكي.

بالاضافه لحصولك على عمولات مقابل انجازك لكل التعاملات الصغيره داخل كل بلوك.

وطبعاً الفلوس دي كلها بتيجي نتيجة تعبك في العمل على البلوكات دي.

وهنا بيجي دور كروت الشاشه انها من خلال قوة معالجتها بتحل معادلات رياضيه صعبه جدا اللي هي متعلقه بالبلوكات اللي سبق وذكرناها فوق.

ايه دخل المعادلات الرياضيه بالموضوع، لانه عالم البرمجه كله متعلق بالرياضه والهندسه، ودي المفروض تكون عندك نقطة بديهيه انت عارفها.

كده فهمنا ايه التعدين ده وازاي بنكسب منه فلوس وفهمنا ايه البيتكوين دي.

ما هي عملة الإيثيريم الإلكترونية ؟

هنا هنتكلم عن عمله تانيه بتحل عيب موجود في عملة البيتكوين، اللي هي عملة اسمها (الايثيريم) اللي إنشأت سنة 2014.

آلية عمل عملة Ethereum الإلكترونية

بمنتهى البساطه عمليات البيتكوين مقتصره ع التحويلات من شخص لشخص مش اكتر.جت بقى عملة الإيثريم وعملت شئ اسمه : Smart Contract 

ماهو Smart Contract  ؟

يعني انا مثلا عايز منك تديني سيريال لعبه معينه انا طالبها منك، هديك في المقابل مثلا هديك انا 10 ايثيرم، باتفاق على يوم محدد يتم فيه العمليه دي، ولو في طرف منفذش اللي هيقوم بيه، كل طرف بيرجعله حاجته سواء سيريال اللعبه ترجع لصحابها، وال 10 ايثيرم يرجعو لصاحبهم برضو.

طبعا الموضوع مش مقتصر على سيريالات الالعاب بس، لا ده مجرد مثال الموضوع متشعب وكبير، وخاصة لو انت مبرمج شاطر هتطلع منه بافكار متنوعه تقدر تستغلها بعملة الايثيرم.

لحد هنا ده الملخص السهل والبسيط لايه هو التعدين ؟ ولايه هو تعدين العملات الرقميه !

كيفية تعدين عملة الإيثريم ؟

التعاملات اللي داخل كل بلوك من البلوكات بتتراوح من 900 ل 950 عملية، واسمها بالانجليزي : Transaction

ودول بتحلهم او بتنجزهم عن طريق عملية حسابيه اسمها : Hashing 

ممكن نبسطها عليكم وتعتبروها عملية تشفير يعني او ضمان للعمليات الحسابيه، وعن طريق الهاشينج ده بيطلعلنا رقم طويل اعداده ثابته اسمه : Merkle Root

 ولكن قيمته متغيره يعني الاكواد نفسها متغيره زي البصمه كده، بس المهم ان الاعدادات ثابته بتاعت الاكواد، ودي بتضمن لنا حاجه مهمه جدا، انه الصعوبه بتاعت العمليات مش بتعلى عن الحد المحدد لها مهما كانت العمليات.

حاجه تانيه مهمه ان كل بلوك بيبقى فيه توقيت العمليات اللي حصلت وبتبقى مرقمه وده بيساعد اكتر على ان كل عمليه تبقى مترتبه في مكانها في البلوكات + انه بيتم اضافة رقم عشوائي عشان يزود من عملية التشفير.

طبعا العمليات دي كلها بيتم عمل ليها هاشينج، او ممكن نسميها برضو عملية تشفير، بس مصطلحها هاشينج، ونتيجة العمليه دي بيطلعلنا رقم معين، الرقم ده على اصحاب التعدين انهم يعوضوه بشوية احتمالات لحد ما يطلع برقم قيمته معينه اقل من القيمه اللي الشبكه محدداها اللي انت بتعدن عليها.

القيمه اللي بتحددها الشبكه دي، هو مستوى الصعوبه في تعدين العملات الإلكترونية على الشبكه في الوقت الحالي.

بصو معايا في الرقم ده عشان المثال يبقى مفهوم اكتر

مثال : 000000000000000000e476fe41ffc559804d530fc5dd1af09f7c3c846faf994f

مستوى الصعوبه الحالي بيبدا من 18 صفر، اللي هم في الاول دول، ف كل ما الاصفار اللي في الاول تزيد كل ما الصعوبه طبعا تزيد، ف انت عليك انك تجيب رقم اقل من الشبكه اللي بتحطه، وبالشكل ده بتبقى انت كسبت السابق ما بين الشبكه وبتحصل على جايزه قيمتها ال 12.5 بيتكوين اللي قولنا عليهم فوق + العموله على التعاملات اللي جوه كل بلوك اللي قولنا عليها برضو فوق.

طب ما كده الموضوع سهل وبسيط اهو ؟!

الموضوع مش سهل وبسيط زي ما انت ممكن تكون متخيل، لانه حتى لو معاك جهاز تعدين العملات الإلكترونية ومركب فيه 6 كروت شاشه او حتى اكتر، وحتى لو لوحدك انت كمان، ف تقريبا هتعد سنتين على ما تفك بلوك واحد.

34000000000000000000000000000000000000

الرقم ده يا عزيزي هو عدد الاحتمالات للرقم اللي المفروض تطلعه، شوف بقى هتعد اد ايه كتير، متخيل ؟ ف انت هتفضل تجرب عدد الاحتمالات دي كلها لحد ما يطلع منهم رقم او قيمه صح، اقل من الرقم اللي محدداه الشبكة.

ما هي مجموعات تعدين العملات الإلكترونية ؟

وهنا بيجي دور مجموعات مهمه جدا دي عباره عن ناس كتير بتتجمع بكل كروتها واجهزتها وطبعا الناتج عن ده قوه كبيره جدا جدا + ده بيسهل من عملية التعدين ويزود المكسب طبعا العائد من التعدين، لانه دلؤتي مستوى الصعوبه عالي جدا، فانت عشان تشتغل لوحدك بالنظام ده طبعا شئ مستحيل.

الجروبات دي او المجموعه دي بيقال عليها مصطلح : Asic

طبعا كل ما الناس وعيت اكتر بموضوع التعدين وكل ما الناس كتروا طبعا كل ما ده هيأثر على مستوى صعوبة التعدين، والصعوبه بتتغير كل 2016 بعد ما بيتحلو، او في التقريب كل اسبوعين مثلا.

طب سؤال، ازاي النظام بيعرف يحسب انا عندي فلوس اد ايه بالتحديد ؟

ايه الدليل اني ممكن مكونش خدت فلوس زياده او ناقصه مثلا ؟

ما هي آلية عمل عملة الإيثريم ؟

بكل بساطه النظام مش بيقولك على رصيدك بس، ده النظام بيجمع كل التعاملات اللي حصلتلك سواء منك او ليك عن طريق الاكونت بتاعك على النظام ده.

تعالو نحط مثال للموضوع

انت جالك 25 بيتكوين وصرفت منهم 10 وبعد كده صرفت من ال 10 دول 5، ف الناتج اللي هيفضل هو 10 بيتكوين بس، والسيستم هو اللي بيقوم بحساب الموضوع ده.

نرجع لموضوع المفتاح اللي ذكرته فوق ده، النظام بيديك مفتاحين بقى مش مفتاح واحد، واحد عام والتاني خاص.

العام ده عشان لو هتديه لواحد يحولك، والخاص ده بتاعك انت خاص بحسابك، ومينفعش تديه لحد، لانه يحمل بياناتك الخاصه جدا بيك.

بس طبعا المفتاح العام ده مربوط بمفتاحك الخاص عن طريق معادلات معينه، تخص الموقع، ف مستحيل حد يعرف انت معاك كام او حققت ايه من المفتاح العام.

يعني الخلاصه هنا، انه عن طريق المفتاح الخاص، تقدر تجيب مفتاحك العام، بس عمره ما هيحصل العكس، انه تقدر تجيب مفتاحك الخاص عن طريق المفتاح العام.

سلبيه احب اذكرها للموضوع ده، انه لو انت حولت فلوس في مكان غلط، الفلوس مش هترجعلك تاني ابدا وضاعت عليك، ودي احد مشاكل النظام برضو.

سلبيه تانيه انه انت مربوط فقط بالتحويلات سواء من وإلى.

وهنا بيجي دور عملة (الايثيرم) اللي قولنا عليه. وميزته انه بيعمل حاجه اسمها السمارت كونتراكت، اللي ذكرتها فوق، انك تتفق على حاجه معينه اي كان ايه، وبتربطها بكود معين وبتقايدها بالمبلغ اللي انت عايزه من الايثريم.

تاني ميزه بقى انه النظام مش بيدعم نظام المجموعات في تعدين العملات الإلكترونية ده، لانه هنا انت ممكن تعدن مع نفسك ولوحدك عادي، وده خلى الناس كتير في العالم تهتم بعملة الايثيرم.

+ ان مستوى الصعوبه فيها مش عالي اوي مقارنة بالبيتكوين مثلا

وده طبعا اللي سبب ندره في كروت الشاشه في السوق وساهم في انه في تجار الله يكرمهم، غلو الكروت جدا جدا جدا.

#ملحوظة : طبعا كان في طلب عالي على بوست تعدين العملات الإلكترونية واهو حصل، ولكن كان عشان ده يحصل لانه كان الطلب شديد جدا ولسه النت متصلح امبارح اخر النهار ومكنش في وقت اعمل الموضوع ببحث مفصل اكتر، ف كان في صفحة صديقه جدا ساعدتنا في الموضوع ده بنسبه كبيره جدا بصراحه انها وفرت علينا بحث كبير جدا، ولخصت انا الموضوع ده بقدر الامكان في البوست وغطيت كل المحتوى المطلوب لاي حد عايز يعرف ايه الدنيا دي.

ممكن يكون في بوستات قادمه عن تفصيل اكتر لموضوع الـ Asic.

وكمان عن العملات اللي ممكن تكون قادمه ولها مستقبل.